Plaid Cymru Arfon Sefyll dros pobl Arfon

Mae AS Plaid Cymru Arfon Hywel Williams wedi cyhuddo NatWest o siomi eu cwsmeriaid ffyddlon wrth i’r banc gadarnhau cynlluniau i gau eu cangen yng Nghaernarfon y flwyddyn nesaf.

Roedd yr AS lleol yn ymateb i'r newyddion bod y banc yn bwriadu cau eu canghen yng Nghaernarfon erbyn Mehefin 2017 fel rhan o raglen gwtogi ar draws gogledd Cymru.

Mae Mr Williams yn cwestiynu y rhesymeg tu ôl i'r penderfyniad ac yn apelio at benaethiaid y banc i ystyried yr effaith y byddai cau’r gangen yn ei gael ar y dref, sydd â diwydiant twristiaeth cynyddol a llawer o fusnesau newydd.

Dywedodd Hywel Williams AS,

“Mae bancio yn un o'r gwasanaethau sylfaenol a pwysicaf y mae pobl yn dibynnu arno ac rwy’n ymwybodol o’r pryder lleol sydd yna yng Nghaernarfon yn sgil penderfyniad NatWest i gau eu cangen yn y dref y flwyddyn nesaf.”

“Nid yw'n ddigon da i'r banc gynghori pob cwsmer ddefnyddio bancio ar-lein oherwydd rydym oll yn gwybod nad oes gan bawb fynediad i gysylltiad rhyngrwyd dibynadwy, yn enwedig mewn ardaloedd gwledig fel rhannau o Arfon.”

“Mae gan fanciau gyfrifoldeb cymdeithasol i wasanaethu ein cymunedau ond yn anffodus mae'r darlun hwn yr un fath ar draws gogledd Cymru, a bydd y cwymp mewn bancio lleol yn brifo y rhai mwyaf bregus unwaith eto.”

“Ar adeg pan fo Caernarfon yn ehangu, nid yw’r penderfyniad yma yn gwneud synnwyr o gwbl.”

“Rwyf wedi galw am gyfarfod brys gyda NatWest i drafod y penderfyniad.”

Ychwanegodd Siân Gwenllian AC,

“Bydd cau banc NatWest yng Nghaernarfon yn ergyd enfawr i gwsmeriaid ac i ganol y dref.”

“Os ydynt yn cau canghennau mewn trefi maint Caernarfon, mae'n codi'r cwestiwn beth fydd yn digwydd i ganghennau mewn cymunedau llai.”

“Mae banciau yn ogystal â fferyllfeydd lleol, swyddfeydd post a gwasanaethau eraill yn bwysig i fywiogrwydd canol trefi ledled Cymru.”

“Maent yn darparu gwasanaeth pwysig i etholwyr a busnesau bach. Mae hwn yn gam yn y cyfeiriad anghywir ar gyfer Caernarfon, sydd yn tyfu fel cyrchfan ganol tref poblogaidd.”